Hæ . . .

Hér er ég eftir smá fjarveru

Ég hef smá verið að skreppa og shoppa undanfarið en eins og ástandið er þá hef ég ekki þorað að segja frá því.   Þetta er auðvitað argasta kæruleysi eða eitthvað. . . 
Allavega þá hef ég verið að shoppa og fylla á hálftómann fataskápinn.  Eins og trúfastir og einlægir lesendur síðunnar muna þá fylltist ég yfirnáttúrulegri góðmennsku hér ekki fyrir svo löngu síðan og gaf hálfann fataskápinn minn.  Þegar kona gerir slíkt góðverk ber að gjalda það. Enginn hefur goldið það, svo ég tók málið í mínar fögru hendur og reddaði þessu. Mér til aðstoðar hafði ég gott lið. Góð liðsheild er mikilvæg í svona átaki sem og öðrum. Minn maður ók mér í okkar draumabíl einn laugardagsmorgunn, rétt fyrir hádegið í bæinn hér í bæ. Við fundum bílastæði í þessum næstum bílastæðalausa bæ. Sígrita á þetta Þegar við höfðum stigið út úr eðalvagninum og læst honum, gengum við eftir stíg inn á göngugötu bæjarins. Ekki vorum  við nema rétt stíginn inn á göngugötuna, þegar við hittum hana Rut. Rut er alveg ferleg kona, þarna var hún í shoopingferð með Guðmundi manni sínum en hafði bara skilið hann eftir í reiðuleysi einhverstaðar, sennilega í Fona  (allavega var það Merlin við hliðina sem fór á höfuðið) Við BT sáum strax að okkar var þörf hér, BT til að bjarga Guðmundi góða úr Fona og á Ib Rene Cario þar sem allir eru hulltir og ég þurfti að hjálpa Rut að shoppa smá   Þetta gerðist allt svo hratt, svo áður en við vissum var BT farin að leita að GG og ég farin að hjálpa Rut. Óþægilega fljótt áttaði ég mig á því að ég var ekki með Dankortið en kona í hug bjargar sér og mér tókst án þess að vera með peninga að versla í 2 góða poka mjög mikilvæg föt, skó og tilbehör Já, við gerðum það gott og þeir gerðu það betra strákarnir. 

Þetta var þessi búðarferð.

Svo kom helgin á eftir, þar sem MT hjálpaði mér og síðan skrapp ég til Íslands og reddaði því með hárnæringarkaupum og fleiru.   Þegar til Dk kom var kona orðin svo þjálfuð að ekki mátti stoppa. Það er nefnilega mjög mikilvægt að halda sér í góðu formi og ég var virkilega komin í gott shoopingform þrátt fyrir efnahagslegar hremmingar Íslands. Þess vegna var það að íþróttaálfur í shoppingformi (ný íþróttagrein í DK kemur, upphaflega frá Ísl.) bað sinn mann að skreppa með sér í A til Z og kaupa leðurstígvél á litlu sys og dagatal handa nöfnunni sinni. Ekki fengust þessir hlutir en til að viðhalda forminu var keyptur svefnsófi fyrir tvo. Já, það er mikilvægt að vera duglegur að æfa, koma sér í gott form og viðhalda því. ... því mun ég skreppa í byen á morgunn og viðhalda forminu. þetta er mitt æfingaplan.

 

Lifið heil!!!

Hvernig væri að lesa þetta:

Íslensk kona hefur verið að styrkja námsmann í Úganda sem "óvænt varð á vegi hennar" eins og hún orðaði það. Hann var búinn að lofa að senda henni einkunnirnar sínar sem hann og gerði þegar þar að kom. Þar kom fram að hann hafði fengið A í öllum fögum og góða umsögn að auki. Það var nefnilega búið að gera honum ljóst að góður árangur væri lykillinn að því að hann fengi áframhaldandi styrk.

En allt er breytingum undirorpið í henni veröld og ýmislegt getur vissulega haft áhrif á afkomu Frónbúans og getu hans til að láta gott af sér leiða. Hún var að velta því fyrir sér hvort rétt væri að reyna að segja honum frá gangi mála hér á landi, þ.e. kreppunni og öllu því. Og það gæti því miður reynst nauðsynlegt að skera eitthvað niður styrkinn vegna hins breytta ástands hérna megin. Það eru nefnilega tiltölulega litlar líkur á því að fréttir af Íslenska skipbrotinu hafi borist alla leið til hans þarna í Entebbe. Og svo er alls ekki víst að hann skilji alvöru málsins á sama hátt og við hér heima. En ef reynt væri að útskýra hið Íslenska kreppuástand fyrir honum sem virðist ætla að fara langt með að sliga þjóðina einhver þó nokkur ár inn í framtíðina, gæti það samtal orðið á eftirfarandi nótum.



*Heyrðu félagi, það er úr vöndu að ráða. Íslenska þjóðin er gjaldþrota!

Hvað segirðu, en leiðinlegt að heyra, eigið þið þá ekki fyrir baunum og maís?

*Jú reyndar eru búðir fullar af mat og enginn vöruskortur.

Hvað segirðu, þið eigið þá mat. Það er gott. En eigið þið þá ekki þak yfir höfuðið lengur!

*Jú við eigum reyndar íbúð eins og flestir og það eru fáir heimilislausir á Íslandi.

En hvað segirðu mér þá? Gengur plága yfir landið, eru allir veikir og heilbrigðiskerfið lamað?

*Nei nei reyndar ekki, við fáum nánast ókeypis læknaþjónustu og erum með ágætt heilbrigðiskerfi.

Nú jæja. Það var gott að heyra. En eru þá skólarnir að loka og fá kannski ekki allir tækifæri til að læra að lesa lengur og sérstaklega þá ekki konur.

*Jú reyndar er 99,9% læsi á Íslandi og menntakerfið er ágætt, margir með háskólagráður og konur ekki síður en karlar.

Það er nú gott, en þið verðið þá að passa er að lenda ekki í stríði við nágrannaþjóðir ykkar.

*Uuuu við erum reyndar ekki með her og teljumst nú frekar friðsæl þjóð. En við þurfum bara að hlusta á bullið og stríðsyfirlýsingarnar í fíflinu honum Gordon Brown. Það er það sem við munum líklega komst næst því að fara í stríð.

Ok. Segðu mér nú samt ekki að þið komist ekki í hreint vatn.

*Við eigum reyndar besta vatn í heimi.

Nú, er vegakerfið þá ónýtt? Hérna í Afríku ganga allir eða nota asna og stundum reiðhjól. Það eru líka til strætisvagnar hérna, en þeir eru alltaf yfirfullir.

Eru kannski strætóarnir hjá ykkur hættir að ganga?

*Neeee... Það er verið að ræða um hvort almenningssamgöngur hér eigi að vera ókeypis, en það eru flestallir vegir malbikaðir og næstum allir eru á nýlegum bílum.

Eigið þið þá enga peninga til að gera ykkur glaðan dag? Ég meina, þú sagðir að þjóðin væri gjaldþrota.

*Flestir eiga reyndar einhvern sparnað á bókum þó sumir hafi tapað honum eða hluta hans síðustu daga. Það verður alla vega erfitt að kaupa stærri flatskjái og utanlandsferðunum verður að fækka.

Já, ég á kannski einhvern tíma eftir að fara til útlanda, en ég er nú líka frá Úganda. Hefur kannski enginn vinnu og þurfið þið núna öll að betla?

*Neiiij...! Atvinnuleysið er um 2% en við verðum að flytja Pólverjana aftur heim og fara sjálf að vinna vinnuna sem þeir unnu.

Hmmm... Svo þið hafið peninga, mat, húsaskjól, heilbrigðiskerfi, menntakerfi, búið við frið, eigið nóg hreint vatn og samgöngur eru góðar.

Segðu mér, hvert var vandamálið aftur?



Eftir þessar vangaveltur um aðstæður okkar hérna uppi á skerinu og þetta ímyndaða samtal, ákvað hún að vera ekki að íþyngja honum með ræfilslegum áhyggjum sínum af "gjaldþrota" eyríki norður í ballarhafi. Námsgjöld hans skulu greidd hér eftir sem hingað til og kannski fær hann líka smá vasapening með. Hann getur þá kannski tekið strætó í skólann endrum og sinnum í stað þess að þurfa ganga í marga klukkutíma eins og venjulega. Fé hins meinta íslenska terrorista yrði þá líklega bara vel varið.

Margt smátt . . .

gerir eitt stórt. Skellti mér heim á klakann að bæta við gjaldeyri þjóðarinnar. Er reyndar ekki búin að versla neitt nema hárnæringu. Það er mikilvægt að líta ekki út sem rassálfur þegar maður tekur að sér að leggja sitt af mörkum til að bæta gjaldeyrisstöðu þjóðarinnar

En að öllu gamni slepptu þá er ég hér og ætla að leika mér smá. Yndislegt að anda að sér fersku haustloftinu og geta skellt sér í Árbæjarlaugina í tíma og ótíma.  Knúsað fókið sitt og bara verið til

Hér er ég með henni litlu nöfnu minni sem varð 7 ára um daginn. Miklir fagnaðarfundir hjá okkur. Á morgunn hitti ég svo tvibba bróðir hennar sem var upptekinn á fjöllum um helgina. Meðal annars á uppáhalds fjallinu okkar, henni Heklu.
Ég stefni á að sækja þau í nýja skólann þeirra.
Forréttindi

Þegar harðnar á dalnum . . .

Atburðir síðustu daga hafa velt lífi íslensku þjóðarinn um koll svo um munar. Afleiðingar þessa mikla hruns eru engan vegin komnar í ljós. Hitt er þó ljóst að þessir atburðir hafa mikil áhrif á sálarlíf fólks. Óvissa er ætandi tilfinning, sem skemmir út frá sér ef ekki er vel að gáð. Sannarlega hafa margir og munu margir verða fyrir miklu fjárhagslegu tjóni vegna þessa bankahruns, ásamt því að í heiminum ríkir kreppa sem er enn ekki skollin á alls staðar af fullum þunga.
Við þessar aðstæður er vert að staldra við og huga að því hver mestu verðmæti okkar eru. Hvað viljum við síst missa? Eru það veraldlegir hlutir eða gott samband við okkar nánustu fjölskyldu og vini? Hvað erum við með allan auð heimsins en enga fjölskyldu eða góða vini? Mínar bestu stundir eru þegar ég veit að mínu fólki líður vel, mínar verstu stundir eru þegar fjölskyldumeðlimir eru alvarlega veikir, heyja baráttu upp á líf og dauða. Þetta er mikilvægt að vera meðvitaður um. Því spyr ég ykkur hvað er það versta sem getur gerst hjá þér?

Góður maður, Júlli Júll á Dalvík hefur farið af stað með sérstaka knúsviku með yfirskriftinni:

KNÚSVIKAN MIKLA
13. - 20. október 2008

Hefur þú knúsað í dag ?

Knúsum okkur í gegnum ástandið.

Hér getið þið lesið meira um þetta framtak hans

Um hugann reikar...

Atburðir síðustu daga hafa verið þannig að ekki virðist viðlit að ganga út frá neinu sem gefnu. Þessir atburðir reyna mjög á "umburðarlyndistaugarmínar" og enn og aftur vil ég ítreka aðdáun mína á því hve vel ráðamenn okkar standa sig með Geir í eldlínunni. Takk Geir!!!

Þessi vísa reikar gjarnan um huga minn þegar mér verður hugsað til breskra hryðjuverkamanna GB:

Ef ég man það ekki skakkt
engan vil þó styggja.
En Kristur hefur sjálfur sagt,
sælla er að gefa en þiggja.

En þegar kraftur orðsins þverr
á andans huldu brautum,
gefa á kjaftinn verðum vér
vorum skuldunautum.
KN

 

Orða vant . . .

Eiginlega hef ég fátt að segja. Finnst of margt að gerast og á nóg með að reyna að fylgjast með atburðarásinni, því það finnst mér mikilvægt. Eitt undrast ég þó og það eru allir snillingarnir sem tjá sig. Eiginlega finnst mér sú snilligáfa minna á eldhúsborðsnillingaumræðu. Það er vandalítið að sitja hjá og fordæma og níða. Sé ekki alla þessa snillinga fyrir mér í þeirri eldlínu sem nú brennur á ráðamönnum okkar. Að standa í eldlínunni og berjast fyrir hinu strandaða fleygi er vandasamara. Því fylgja miklar ágjafir. Þar fá fáir hrós í augnablikinu. Ég er nú bara þannig að ég dáist að þeim styrk sem ráðamenn þjóðarinnar sína á þessum hrikalegu tímum þar sem hvert áfallið dynur á annað. Þeirra verkefni er stórt og yfirsýnin sem þeir þurfa að hafa er mikil. Hlutirnir gerast hratt og það sem var áðan er ekki núna.

Megi samstaða koma okkur í gegnum þennan vítiseld.

Home alone . . .

Já já, bara alein heima með hundinn. Fjölskyldan út um hvippinn og hvappinn í mislangan tíma. Smá skrítið að vera svona ein heima en samt allt í lagi því það er bara stutt

Það er þó ýmislegt sem kemur á daginn í mínu eðli þegar ég er svona ein. Ó, já. 

 

Nú eru það leyndarmálin sem afhjúpast.

 

Humm... bull

 

Bara að skapa stemmingu

 

Málið er að ég hef komist að því að það er þokkalega gott fyrir mig að ég bý ekki ein!

Ég kann ekki að borða ein! Þar með er eitt leyndarmál afhjúpað
Byrja daginn fínt að vanda með sheik. Svo er vatnið en síðan er bara allt í bullandi tjóni! Í gær borði ég 5 kleinur og þar með var næringu þess dags lokið. Já, sheik og 5 kleinur. í dag sheikinn og vatnið (er vatnssjúk) og síðan. . . úff nú er illt í efni pulsa með öllu og franskar. Að sjálfsögðu vatn með. Enginn kvöldmatur, en nú var ég lögst fyrir framan imbann með popppoka að horfa á einhvern þátt. Man ekki á hvaða rás, því ég "sappaði væk" þegar komu auglýsingar og nú finn ég ekki rásina aftur og allstaðar eru auglýsingar eða vonlausir þættir. Man núna af hverju ég horfi svona lítið á sjónvarp, ég hef bara ekki þolinmæði í þetta auglýsingavesen. Kannski ég ætti að krefjast þess að vera bara með eina rás? 

Já, eins og ég  sagði hér í upphafi, ég er ein heima og til að vekja ekki athygli þjófa og ræningja á því er ég bara með kveikt á kertum. Það kemur líka í veg fyrir að einhver álpist hér í heimsókn á meðan ég er í þessu leikriti mínu

Nú, ég er frekar tæknivædd/sjúk kona er mér ljóst og til að fá útrás fyrir það er ég bara með kveikt á tveimur tölvum, var að slökkva á þeirri þriðju og sú fjórða er vandlega pökkuð niður í Nike tölvutöskuna mína. 

Það er orðið of seint að halda áfram að leita að þessum vitlausa þætti sem ég tíndi, því ég veit að nú er að hefjast danskur þáttur um sjötta skilningarvitið og sorry þar finnst mér Danir frekar lost, svo ég horfi ekki á þessa þætti.

En já, ég er með kveikt á tveimur tölvum því ég ætla að vera viðbúin þegar prinsessan í Ammríkuhreppi kemur heim úr skólanum á eftir, nú á að tala við krakkann

Over and out

 

Still home alone

 

. . . að hafa samband í gegnum síma eða tölvu ?

Barnið mitt í Ammríkuhreppi hefur svo mikið að gera að hún hefur ekki getað hringt í okkur. Reyndar var hún búin að kaupa alþjóðlegt símakort þarna í sveitabúðinni en það kom í ljós í gær að það virkar ekki til DK. Skiljanlega, það er nú ekki eins og DK sé nafli alheimsins.
Ég var búin að biðja hana að láta þessi kaup vera og nota bara msn og Skype. Hún hefur einhverra hluta vegna ekki verið fáanleg til að tala við okkur í gegnum tölvuna, finnst það asnalegt. Verð bara að segja að það er í raun líka asnalegt að tala í síma, sérstalega ef maður er með heyrnasett við símann. Man eftir því þegar ég tók eftir því í fyrsta sinn hver fáranlegt það er að ganga um með heyrnasett í eyranu og talandi út í loftið við "engann". Þessi náungi sem ég sá, var á Kastrup, klæddur í jakkaföt, skyrtu og bindi, með stressara í annari hendinni. Hann gekk þarna um flugstöðina, talandi út í eitt og sveiflandi lausu hendinni út í loftið. Ég man ég hugsaði: æ,æ, farinn yfir af stressi
Vona að snúllan mín í Ammríkuhreppi sætti sig við að tala við mig í tölvunni, því það er eina vitið

Barnið mitt í stórborginni er með símaáskrift þannig að það er frítt að hringja í mig, svo það er ekki málið. Bara hringja meira til að græða meira

Barnið mitt hér í Suðursólarborg er líka með svona fría áskrift en nú spörum við batteríin í símanum og tölum saman því við erum báðar heima núna, sjaldan þessu vant.

Over and out farin að tala
...og bíða

. . .

Má bara ekki vera að því að blogga eða lesa blogg annara, né heldur kvitta því  því ég er á fullu að fara eftir sjtörnuspánni minni á mbl.is...

 

Ljón: Eyddu tíma í að líta geðveikt vel út. Útlitið skiptir miklu máli, ekki af því að öðrum er ekki sama, heldur líður þér best þegar þú ert ánægður með sjálfan þig.

 

Hummm. . .  voðaleg viska er þetta

 

Over and out . . . 

 

Hvort er maður í . . .

Er bara að velta fyrir mér hvort ég "hangi " í lausu lofti eða hvort ég sé í "hlutlausum" gír. Er í svona "stuði" þar sem mér verður minna úr verki en hugsun Er til dæmis í huga mér búin að skipuleggja breytingar hér innan húss. Komin lítið lengra en að skila Stínu nabo rúminu sem fósturbarnið var með. Gerði það á mánudagskvöldið. Fattaði í gærkvöldi um níu leitið að ekkert meira hafði gerst í þessum breytingum svo ég tengdi ryksuguna og lét hana vinna sitt verk, flutti kommóðu frá einum vegg til annars. Skellti mér svo út á pall með mínum manni og horfði í lotningarkenndri hrifningu á ljósin sem hann er búin að setja í handriðið á pallinum okkar.
Já, ég hef nú ekki sagt neitt að ráði frá þessum palli og það er nú eiginlega bömmer. Þannig er að við erum að byggja "íslenskan" pall í kringum hálft húsið. Hann er með handriði og ljósum. Á pallinum eru útskot og eitt og annað sem gerir hann fínan. Um síðustu helgi vorum við í götugrilli og þá áttuðum við okkur á, að nágrannar okkar hér í götunni hafa fylgst vel með þessum framkvæmdum. Þykir pallurinn stór og flottur. Já, alveg ótrúlega stór Við vorum ekkert að segja að hann á eftir að stækka, það mun líklega ekki fara fram hjá nokkrum manni þar sem stækkunin kemur í átt að innkeyrslunni. Blessað fólkið botnar hvort sem er ekkert í okkur

En aftur að því að vera í lausu lofti eða í hlutlausum gír. Gerist ekkert hjá mér. Bara hugsa. úff...
Er að velta því fyrir mér hvort þetta lagist þegar ég er búin að fara til Tyrklands. Er kannski svona truflandi að vera alveg að fara þangað og svo ekki. Hélt að ég væri að fara þangað á mánudagskvöldið, vissi það um eitt þann dag að svo var ekki. Nú er ég sjálf búin að ákveða að ég fer í fyrsta lagi á laugardaginn sama hvað "Flösku Dísa" gerir.

Best að hætta þessari tímaeyðslu og fara að hengja út þvott eða var ég að hugsa um að tína tómata????

Sennilega tæmi ég bara uppþvottavélina